6 ـ ايدىڭ 26 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جازعى داۆوس تالقى مىنبەرىنە قاتىناسۋ ٴۇشىن جۇڭگوعا كەلگەن ۆيەتنام زۇڭليـى فان ميڭجىڭمەن كەزدەستى. □ سۋرەتتى شينحۋا اگەنتتىگىنىڭ ٴتىلشىسى ياۋ دا ـ ۋي تۇسىرگەن
شينحۋا اگەنتتىگىنىڭ 6 ـ ايدىڭ 26 ـ كۇنى بەيجيڭنەن بەرگەن حابارى (ٴتىلشى جىڭ ميڭدا). 6 ـ ايدىڭ 26 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جازعى داۆوس تالقى مىنبەرىنە قاتىناسۋ ٴۇشىن جۇڭگوعا كەلگەن ۆيەتنام زۇڭليى فان ميڭجىڭمەن كەزدەستى.
شي جينپيڭ فان ميڭجىڭعا باس شۋجي رۋان فۋجۇڭعا جانە مەملەكەت ٴتوراعاسى سۋ لينگە جولداعان ىقىلاستى سالەمىن جەتكىزۋدى ايتتى. شي جينپيڭ بىلاي دەپ اتاپ كورسەتتى: بىلتىر جىل سوڭىندا ۆيەتنامدا ساپاردا بولعان كەزىمدە باس شۋجي رۋان فۋجۇڭمەن بىرگە ستراتەگيالىق مانگە يە جۇڭگو _ ۆيەتنام تاعدىرلاس ورتاق تۇلعاسىن قۇرۋدى جاريالاپ، ەكى ەل قارىم ـ قاتىناسىنىڭ جاڭا كەزەڭگە وتۋىنە جەتەكشىلىك ەتتىك. جارتى جىلدان استام ۋاقىتتان بەرى ەكى پارتيانىڭ، ەكى ەلدىڭ جوعارى جىكتەگىلەرىنىڭ بارىس ـ كەلىسى جيىلەپ، ٴار سالاداعى سەلبەستىگى ٴساتتى ىلگەرىلەپ، ەكى ەل حالقىنا ناقتى پايدا جەتكىزدى. قازىر دۇنيە جۇزىندە 100 جىلدىق وزگەرىس جاعدايى جەدەل قۇبىلۋدا، جۇڭگو مەن ۆيەتنامنىڭ ەكونوميكانىڭ جىلدام دامۋىن جانە قوعامنىڭ باياندى ورنىقتىلىعىن ساقتاۋى سوتسياليستىك ٴتۇزىمنىڭ ابزالدىلىعىن ايگىلەدى. ستراتەگيالىق مانگە يە جۇڭگو _ ۆيەتنام تاعدىرلاس ورتاق تۇلعاسىن قۇرۋ ەكى ەلدىڭ وزدەرىنىڭ وسىزامانداندىرۋ قۇرىلىسى قاجەتىنە ۇيلەسەدى، ٴوڭىردىڭ بەيبىتشىلىگىن، ورنىقتىلىعىن قورعاۋعا، دۇنيە سوتسياليزم ىستەرىنىڭ دامۋىن جەبەۋگە ٴتيىمدى. جۇڭگو جاق ۆيەتنام جاقپەن ستراتەگيالىق جەتەكشىلىكتى كۇشەيتىپ، ”التى اناعۇرلىم“ جالپى تۇلعالىق نىساناسىن ارقاۋ ەتىپ، ىنتىماقتان، دوستىقتان بۇلجىماي، ٴبىرىن ـ ٴبىرى باتىل قولداپ، ٴوزارا تيىمدىلىك جەتكىزۋ سەلبەستىگىن تەرەڭدەتىپ، وسىزاماندانۋعا قول ۇستاسا قادام تاستاپ، دۇنيە ٴجۇزىنىڭ بەيبىتشىلىگىنە، ورنىقتىلىعىنا، دامۋىنا، گۇلدەنۋىنە اناعۇرلىم زور ۇلەس قوسۋدى قالايدى.
شي جينپيڭ بىلاي دەپ باسا دارىپتەدى: جۇڭگو رەفورمانى جاپپاي تەرەڭدەتۋگە، جۇڭگو ۇلگىسىندەگى وسىزامانداندىرۋدى ىلگەرىلەتۋگە تاباندى بولادى، بۇل ەكى جاقتىڭ ەكونوميكا ـ ساۋدا، ۇلاستىرۋ ـ تۇتاستىرۋ، سيفرلى ەكونوميكا سياقتى سالالارداعى سەلبەستىكتى كەڭەيتۋىنە جاڭا وراي اكەلەدى. ەكى جاق جوعارى جىكتەگىلەردىڭ اۋىس ـ كۇيىسىن ساقتاپ، ”ٴبىر بەلدەۋ، ٴبىر جولدى“ جوعارى ساپالى بىرگە قۇرۋدى بىرگە ىلگەرىلەتىپ، ەكى ەلدىڭ ۇلاسۋ ـ تۇتاسۋ دەڭگەيىن جوعارىلاتىپ، ەكى ەلدىڭ ناقتى سەلبەستىگىنىڭ جوعارى ساپالى دامۋىن ىلگەرىلەتۋ كەرەك. جۇڭگو جاق اناعۇرلىم كوپ جۇڭگو كاسىپورنىن ۆيەتنامعا قارجى قوسۋدى ارتتىرۋعا شابىتتاندىرۋدى قالايدى، ۆيەتنام جاقتىڭ جۇڭگو كاسىپورىندارىنا تەڭ، ٴادىل، كەمسىتپەيتىن شارۋاشىلىق ـ ساۋدا ورتاسىن ازىرلەۋىن ٴۇمىت ەتەدى. ەكى جاق ەكى پارتيانىڭ دوستىق بارىس ـ كەلىسى قىزىل بايلىعىنان ۇتىمدى پايدالانىپ، شەكارا ولكەلەرىنىڭ اۋىس ـ كۇيىستى كۇشەيتۋىنە قولداۋ كورسەتىپ، اۋىل شارۋاشىلىعى، وقۋ ـ اعارتۋ، ەمدەۋ سياقتى حالىق تۇرمىسى نىساندارىن ويداعىداي اتقارىپ، حالىقتىق، جاستار سياقتى اۋىس ـ كۇيىس تۇعىرلارىنان ويداعىداي پايدالانىپ، جۇڭگو _ ۆيەتنام دوستىعىنىڭ حالىق رايى نەگىزىن بەكەمدەۋى كەرەك. ەكى جاق تەڭىز ماسەلەسىن ۇيلەسىمدى شەشىپ، تەڭىزدەگى بىرگە اشۋدى جەدەل ىلگەرىلەتىپ، ٴوڭىردىڭ بەيبىتشىلىگىن، ورنىقتىلىعىن بىرگە قورعاۋى كەرەك.
فان ميڭجىڭ باس شۋجي رۋان فۋجۇڭنىڭ جانە مەملەكەت ٴتوراعاسى سۋ ليننىڭ باس شۋجي شي جينپيڭگە جولداعان ىقىلاستى سالەمىن جەتكىزە كەلىپ، مىنالاردى ٴبىلدىردى: ۆيەتنام مەن جۇڭگو ٴداستۇرلى تاتۋ كورشىلەر، دوستار، ەكەۋى دە كوممۋنيستىك پارتيا باسشىلىعىنداعى سوتسياليستىك ەل. ۆيەتنام جاق جۇڭگونىڭ باس شۋجي شي جينپيڭنىڭ دانىشپان باسشىلىعىندا جان ـ جاقتى ۇلى تابىستارعا قول جەتكىزگەندىگىن شىن نيەتپەن قۇتتىقتايدى، جۇڭگونىڭ دۇنيە ٴجۇزى ەكونوميكاسىنىڭ ارتۋىندا ساۋلەلەندىرگەن ماڭىزدى قوزعالتقىشتىق جانە ورنىقتىرعىشتىق رولىنا بەلسەندى باعا بەرەدى. ۆيەتنام جاق جۇڭگونىڭ دامۋىن، قۇدىرەتتەنۋىن، گۇلدەنۋىن، ەكىنشى 100 جىلدىق كۇرەس نىساناسىن ۋاعىندا جۇزەگە اسىرۋىن، دۇنيە ٴجۇزىنىڭ بەيبىتشىلىگى مەن دامۋىندا اناعۇرلىم ماڭىزدى رول ساۋلەلەندىرۋىن قولدايدى. ۆيەتنام جاق شي جينپيڭ جاڭا ٴداۋىر جۇڭگوشا سوتسياليزم يدەياسى ايگىلەگەن تاريحي كوز ايانى، الەمدىك كوز ايانى جانە قۇلاشىن كەڭ جايعان ۇلى كۇشتى بارىنشا القايدى، ٴتوراعا شي جينپيڭ العا قويعان جەلىلەس الەمدىك باستامالاردى قولدايدى، جۇڭگونىڭ «جان ـ جاقتى جانە العا باسقان تىنىق مۇحيت اتتاعان سەرىكتەستىك قارىم ـ قاتىناس كەلىسىمىنە» كىرۋىن قولدايدى، ەكونوميكا ـ ساۋدا، عىلىم ـ تەحنيكا ماسەلەلەرىن ساياسيلاندىرۋعا قارسى تۇرادى. ۆيەتنام جاق جۇڭگونىڭ پارتيا باسقارۋ، ەل باسقارۋ جونىندەگى جاڭا نازاريالارىنان، جاڭا امالياتتارىنان، جاڭا جەتىستىكتەرىنەن ۇيرەنۋدى جانە ودان ۇلگى الۋدى، جۇڭگو جاقپەن بىرگە سوتسياليزم جولىمەن جۇرۋگە تاباندى بولىپ، بىرگە دامۋدى جۇزەگە اسىرۋدى ٴۇمىت ەتەدى. جۇڭگو پارتياسى مەن ۇكىمەتىنىڭ ۆيەتنامنىڭ ۇلت تاۋەلسىزدىگىن جانە مەملەكەتتىڭ دامۋىن جۇزەگە اسىرۋىنا قىمباتتى كومەك كورسەتكەندىگىنە العىس ايتادى. ۆيەتنام جاق جۇڭگو جاقتىڭ تايۋان ماسەلەسىندەگى تۇرعىسىن قولدايدى، ٴبىر جۇڭگو پرينسيبىنە باتىل بويسۇنادى، ۆيەتنام مەن جۇڭگونىڭ ستراتەگيالىق ٴوزارا سەنىمدىلىگى مەن ناقتى سەلبەستىگىن تەرەڭدەتۋدى، ستراتەگيالىق مانگە يە تاعدىرلاس ورتاق تۇلعا قۇرۋدى ۆيەتنامنىڭ سىرتقى ساياساتىندا ماڭداي الدى ورىنعا قويادى جانە ستراتەگيالىق تالعامى ەتەدى، سىرتتىڭ ىرتكى سالۋىنا جانە كەدەرگىلىك جاساپ بۇلدىرۋىنە ۇشىرامايدى. باس شۋجي، مەملەكەت ٴتوراعاسى شي جينپيڭنىڭ بىلتىر ۆيەتنامدا تابىستى مەملەكەتتىك ساپاردا بولۋى ۆيەتنام _ جۇڭگو قارىم ـ قاتىناسىنداعى تاريحي بەلەس سانالادى. ۆيەتنام جاق جۇڭگو جاقپەن بىرگە سول جولعى ساپارداعى ماڭىزدى جەتىستىكتەردى مۇقيات تياناقتاندىرىپ، ”التى اناعۇرلىم“ جالپى تۇلعالىق نىساناسى بويىنشا ساياسي ٴوزارا سەنىمدىلىكتى ۇزدىكسىز نىعايتىپ، ناقتى سەلبەستىكتى تەرەڭدەتىپ، جاستاردى اۋىس ـ كۇيىس جاساۋعا شابىتتاندىرىپ، حالىق رايى نەگىزىن بەكەمدەپ، كوپ جاقتى ىستەستىكتى كۇشەيتىپ، الاۋىزدىقتاردى ۇيلەسىمدى ٴبىر جاقتى ەتىپ، ستراتەگيالىق مانگە يە ۆيەتنام _ جۇڭگو تاعدىرلاس ورتاق تۇلعاسىن شىن مانىندە ىلگەرىلەتۋدى قالايدى.
ۋاڭ ي كەزدەسۋگە قاتىناستى.
