شينحۋا اگەنتتىگىنىڭ 9 ـ ايدىڭ 12 ـ كۇنى بەيجيڭنەن بەرگەن حابارى. 9 ـ ايدىڭ 12 ـ كۇنى مەملەكەت ٴتوراعاسى شي جينپيڭ 2024 ـ جىلعى جۇڭگو حالىقارالىق قىزمەت وتەۋ ساۋدا جارمەڭكەسىنە قۇتتىقتاۋ حاتىن جولدادى.
شي جينپيڭ بىلاي دەپ اتاپ كورسەتتى: قىزمەت وتەۋ ساۋدا جارمەڭكەسى 10 كەزەك ٴساتتى وتكىزىلدى، ول جۇڭگونىڭ قىزمەت وتەۋ كاسىبى مەن قىزمەت وتەۋ ساۋداسىنىڭ جوعارى ساپالى دامۋىنىڭ جاندى بەينەسى بولىپ، اشىق تيپتەگى دۇنيە ٴجۇزى ەكونوميكاسىن قۇرۋعا بەلسەندى ۇلەس قوستى. جۇڭگو جوعارى ساپالى دامۋدى جوعارى دەڭگەيدە ەسىك اشۋ ارقىلى ىلگەرىلەتۋگە تاباندى بولىپ، جوعارى دەڭگەيدەگى سىرتقا ەسىك اشۋ ٴتۇزىلىس ـ مەحانيزمىن كەمەلدەندىرىپ، قىزمەت وتەۋ ساۋداسىندا جاڭالىق اشىپ، دارەجەسىن جوعارىلاتىپ، حالىقارالىق جوعارى ولشەمدەگى ەكونوميكا ـ ساۋدا ەرەجەسىمەن ىرىقتىلىقپەن ٴتۇيىلىسىپ، قىزمەت وتەۋ سالاسى ەرەجەسىنىڭ، ٴتۇزىمىنىڭ، باسقارۋىنىڭ، ولشەمىنىڭ ٴوزارا ۇلاسۋىن، ۇيلەسۋىن جەبەپ، قىزمەت وتەۋ بازارىنىڭ سىرتقا اشىلۋىن تارتىپپەن ۇلعايتىپ، قىزمەت وتەۋ كاسىبى مەن قىزمەت وتەۋ ساۋداسى اشىق تۇعىرىنىڭ يقۋاتىن كۇشەيتىپ، بازارلانعان، زاڭمەن باسقارىلاتىن، حالىقارالانعان وزىق شارۋاشىلىق ـ ساۋدا ورتاسىن تۇلعالايدى. جۇڭگو دۇنيە جۇزىندەگى ٴار ەلمەن بىرگە ەكونوميكانىڭ جاھاندانۋ بەتالىسىنا سايكەسىپ، ورايدان تەڭ يگىلىكتەنىپ، سەلبەستىك جاساسۋدى بىرگە اقىلداسىپ، دامۋدى بىرگە جەبەپ، دۇنيە ٴجۇزى ەكونوميكاسىنىڭ ارتۋىن ىلگەرىلەتۋگە، ٴار ەل حالقىنىڭ قۇت ـ ىرىسىن ارتتىرۋعا ۇلەس قوسۋدى قالايدى.
2024 ـ جىلعى جۇڭگو حالىقارالىق قىزمەت وتەۋ ساۋدا جارمەڭكەسى سول كۇنى بەيجيڭدە شىمىلدىعىن اشتى، نەگىزگى تاقىرىبى ”الەمدىك قىزمەت وتەۋ، ٴوزارا پايدا جەتكىزىپ تەڭ يگىلىكتەنۋ“، جارمەڭكەنى ساۋدا ىستەر مينيسترلىگى مەن بەيجيڭ قالالىق حالىق ۇكىمەتى بىرگە باس بولىپ ۇيىمداستىردى.
